امبارح حصل موقف غريب مع الأولاد "الفاروق والبراء"

كنا على الغدا وقولتلهم إن جيرانا اللي فوقينا راجعين من الشغل النهاردة متأخرين وتعالوا نطلعلهم أكل من اللي ماما عاملاه النهارده لأنهم مش حيلحقوا يعملوا أكل

كان رد فعلهم غريب شوية "لأ" ،،، مش عارف ليه؟ هل كانوا جعانين مثلا ولا زعلانين من جيرانا دول؟ مش عارف

المهم حاولت اقنعهم ،، قالوا برضه "لأ"

رفضت إني أخلي زوجتي تطلع أكل من غير رغبة الأولاد علشان مايبقاش إجبار أو إحراج ليهم "والجايات كتير"

المهم وإحنا على الأكل اتفاجأت بالسبب "حضراتهم خايفين إن الأكل يطلع نصه للجيران ومايكفيش" ،،، العيال طلعت بخييييييييييييييييييييييلة

عديت الموضوع وقلبتها بهزار لكن وضحتلهم إني زعلان من السلوك ده لكن من غير ما أكون زعلان منهم

وبالليل وإحنا داخلين ننام روحت معاهم على سرايرهم علشان الحدوتة وكنا خلصنا السيرة النبوية في الحدوتة ووصلنا لحد خلافة سيدنا أبو بكر

حكينا موقف صغير وقلتلهم كده كفاية ومين يقولي حكاية من أيام سيدنا محمد ، وكنت عاوز اجيبلهم موقف للكرم والإيثار علشان أعالج الموضوع ده

فرد الفاروق وقال أنا يا بابا ححكيلك حكاية الفرخة بتاعت سيدنا جابر بن عبد الله اللي كفت الجيش كله لما النبي عطهالهم

طبعا حضراتكم عارفين القصة دي "لما كانت غزوة الخندق وكان المسلمون يعانون من الجوع الشديد ، حتى أنهم كانوا يربطون على بطونهم حجر وإذا بالنبي عليه السلام يربط حجرين من شدة الجوع،

وجاء جابر بن عبد الله وقد شق عليه أن يرى رسول الله هكذا، و قال يا رسول الله : عندنا في البيت دجاجة وبقية شعير فتعالى يا رسول الله وكل معي ،

فنظر إليه النبي وقال : وحدي؟ فقال له جابر بن عبد الله: ومعك رجل أو اثنين . فوقف النبي على تلٍ وقال : يا معشر المهاجرين ، يا معشر الأنصار : غداؤنا اليوم عند جابر بن عبد الله.

يقول جابر: فتسللت وجريت إلى البيت أقول لزوجتي: رسول الله قادم ومعه الجيش ،فقالت هذه المرأة المسلمة المؤمنة : أو أخبرت رسول الله بالطعام ؟ فقال : نعم ، قالت : فالله ورسوله أعلم ،

ويقف النبي ويقول لجابر : أنت بوابنا اليوم ، وقام النبي بتكسير الخبز ويدخل جابر عليه عشرة عشرة يطعمهم ويخرجوا ، يقول جابر بن عبد الله ، كلما دخلت مجموعة قلت إنها آخرمجموعة ولن تأكل التي تليها ،

ولكنهم كانوا يخرجون وقد امتلأت البطون، يخللون أسنانهم ، ثم دخل جابر في النهاية فقال له النبي: يا جابر بارك الله لك ولأهل بيتك في طعامك ، فدخلت فإذا بالطعام كما هو إلا قطعة من الدجاجة فمع انهم كانوا جوعى منذ مدة الا ان الجيش كله قد طعم و شبع فقد ظهرت معجزة النبى صلى الله عليه و سلم و حلت البركة ليعلمهم الإيثار و ان البركة تحل معه فصلى الله علي نبينا معلم الإيثار

المهم نرجع تاني مع الفاروق والبراء

الفاروق قال القصة تاني والبراء بيراجع معاه وقولتلهم طب ليه بقه احنا ما طلعناش لجيراننا الأكل النهاردة "وبالمناسبة كانت برضه فراخ" مع إن القصة بتعلمنا إن الكرم بيخلي فيه بركه في الأكل وبيكفي

فاتكسفوا شوية وعملت مش واخد بالي

وقلتلهم ايه رأيكم نعمل احنا القصة دي تاني ونجرب ونشوف ربنا حيبعتلنا بركة ازاي في الأكل لما نطلع لجيرانا

واتفقنا تاني يوم نعمل كده ونطلع نص الأكل

وفعلا رتبت الأمر مع زوجتي وخلينا الفاروق والبراء أول لما الأكل خلص أخدو نصه وطلعوه للجيران واتبقى نص الأكل ،، وياللعجب ،،

جالنا ضيوووووووف !!!!!!!!!

بابا حبيبي جه يزورني وقعد يتغدى معانا وقعد الأولاد يبصولي وأنا اضحكلهم

واتغدينا فعلا .. كلنا وشبعنا كلنا واتبقى أكل للعشا من وجبة الغدا وظهرت بركة ربنا في الأكل بوضوح

قولتلهم إيه رأيكم بقه في البركة بتاعت ربنا .. كانوا فرحانين جدا

ومن هنا ارجع تاني وأقول لحضراتكم حدوتة قبل النوم قيمة مش مجرد كلام لو حولناها واجبات عملية حتبقى أروع وسيلة تربوية لأولادنا

مع خالص تحياتي

المستشار الأسري

عمر محمود

رابط التعليقات على صفحة الفيس بوك

http://www.facebook.com/note.php?note_id=208258152542634

إضافة إلى المفضلة

المفضلة

إرسال إلى صديق

المشاهدات: 327

التعليقات (0)

RSS خاصية التعليقات

أضف تعليق

الإسم

البريد الإلكتروني

الموقع الإلكتروني

العنوان

التعليق

تصغير | تكبير

الإشتراك بواسطة البريد الإلكتروني (الأعضاء المسجلين فقط)

نعم قرأت و أوافق على شروط الإشتخدام.

أضف تعليق